تخيل فقط !

تخيل معي فقط

ماذا لو لم تكن مع الثوره ؟!

كنت ستبقى هذا الطفل البائس , ستجلس فى بيتك وغرفتك على جهاز كمبيوتر قديم , تتصفح الانرنت والفيس بوك , المهتمه بالثقافه والفن والرياضه , او اى ان كان ما كان , حتي صفحة الشرطه المصريه كنت ستكون اول الحاضرين بها طبعا من اجل التحفيل والشتيمه فى اى شيئ وكل شيئ حتي اذا لم تفهمه , ستكون احد معجبين توفيق عكاشه , ومن بعده احمد موسي وغيره , كنت ستعشق الاعلام المزور والذائف ظناً منك انه الطريق الوحيد الصادق 

كنت ستقضي الكثير من وقتك من بين لعبة المزرعه السعيد الى كاندي كراش , كنت سنتظر السماد من صديقك بالساعات من اجل ان تحسد المحصول 

ستكون صفحتك الشخصيه مليئه بالبوستات التافهه , ستعيد نشر تحديثات وبوستات صفحات من نوعية "بحبك , محبين الفنان تامر حسني , انت عمري " وغيرها , ستكون اول المشتركين فى تطبيق وذكر الذي يبث الاحاديث والايات ليل ونهار , حتي ان الناشرين الاساسين للتطبيق اعتقد انهم لا يلتفتون حتي لما يكتبون 

سيكون الغلاف الشخصي لك هو مجموعه من الاسود المحاطه بالسيسي والقلوب ايضا فلا يمكن ان يخلوا كوفر للسيسي من هذه الاشياء , ستكون صورتك الشخصيه هي صوره للممثل اجنبي او حتي صورة لأثنان محتضنين بعضهما مكتوب عليها " الحب مات من بعدك يا نجات" 

ستتسلل الى صفحات من يطلقون على انفسهم ثوارً لتسبهم بأوسخ ما تعلمته من شتائم , لن يلوم عليك احد , هم يعلمون انك تعلم انهم خونه وعملاء. 

"كيف تنسي شخص ما في 7 ايام "المجموعه الشامله""

ازاى تنسي حد - حاجه "عزيزه عليك" ؟

يمكن اكتر حاجه بحثت عنها من وانا صغير فى جوجل مع بداية دخول النت بيتنا هو ازاى تنسي شخص , اغلب الاجابات كانت بتسببلى عقم , ولحد دلوقت مش متأكد لو اتجوزت مراتي هتخلف ولا لا, ما علينا ممكن اجيبلكم شوية حجات صغيره كده من الاجابات الى موجوده لما بتبحث عن " كيف تنسي شخص ما"

1- كانت اول اجابه فى محرك البحث من "جوجل اجابات" محتواها " اخوي ابو عامر اذا بدك تنسي حد اشغل نفسك بالصلاه وقراءة القرأن وحاول الا تشغل عقلك بأي شي اخر , مشكور لمرورك اخي ارجو التقيم".

2- اما التانيه كانت 9 خطوات,دول واحده منهم عشوائياً " لا بد أن تبكى على كل الأشياء التى ينبغى أن تبكى من أجله" وده محن ملناش دعوه بيه".

وده طبعا انا جربته كلو ومجابش اي حاجه, من الاخر كده عاوز تنسي حد الخبره كلها ممكن تاخدها من المدونه دي, هتاخدها من شخص قعد 9 سنين يدور ويبحث فى الموضوع ده.

هنقسم الا7 ايام دول زي الخطوات يعني :-

اليوم الاول :- الخطوه الاولي :- 

الاكيد طبعا انه نوع النسيان بيختلف من شخص لأخر على حسب نوع الارتباط ونوع الفراق والبعد 

بمعني اوضح " ازاى تنسي شخص ميت , ازاي تنسي واحد/ه بتحبه\ا, ازاي تنسي حاجه ضاعت منك كنت بتحبها"

" ازاى تنسي شخص ميت" : لازم تبقى مقتنع ان كلنا فانين مفيش حد قاعد فيها , هيجي وقت وكلنا لازم هنموت , بس بنختلف فى الوقتت "الميت بيرتاح الحي هو الي بيتعب", انا نظرتي من حوالى سنتين لأبويا وامي وديما بتخيل مرضهم والامهم ووقت موتهم , بتخيل اليوم الى هما مش هيقدرو يردو عليا في تاني , حتي بتخيل مين فيهم هيدخل الجنه ومين فيهم هيدخل النار, لو اتعاملت بالمنطق ده  اسبوع لو اكتر حد عزيز عليك مات صدقني هتزعل شويه وبعدين هتقول عادي .. 

" ازاي تنسي واحد\ه بتحبه\ا" : الموضوع ده صعب جدا على ناس , وسهل جدا جدا على ناس, احنا خلينا فى الناس الصعبه,بما اني منهم وبيبقى اكتر حاجه صعبه بتمر عليا هي اني اسيب واحده بحبها, لاكن المره قبل الى فاتت, فى علاقتي كانت اكبر فترة اكتئاب مريت بيها, حبيت واحده محبتنيش, بعيدا عن تفاصيل الموضوع والحكايه,بس انا بعد لما اكتئبت 9 شهور وفكرت هو انا ليه عملت فى نفسي كده ؟ .. عرفت اسهل طريقه تنسي بيها حد"بما اني توهت ال7 ايام هنرجع ليهم تاني اهو"

اليوم الاول : اصحي من النوم قول جوه عقلك انك كويس جدا وان انهارده يوم حلو ولازم تعمل حاجه جديده , لو عقلك طاوعك وسمع كلامك اول يوم كده انت تمام وتقدر تدخل معانا المرحله التانيه , ولو مقتنعش هتدخل معايا بردو المرحله التانيه عشان تقدر تنسي اكتر.

اليوم التاني : لو صحيت من النوم عادي ومحستش انك عاوز تسأل على الشخص ده يبقى انت كده تمام , بس مش بدرجة 100% , فا تقدر تعمل حاجه جديده خالص زي مثلا انك تقرأ كتاب , او تخرج مع ناس كتير من صحابك , لو مش هتقدر تعمل دول , تقدر انك تاخد كورس مثلا على الانترنت لأي مجال انت بتحبه "تقدر تستخدم بحث جوجل فى الموضوع ده" , وكمان بدل ده كله لو مش حابب وهتحس بالملل "ممكن تبدأ تدور على لعبة حلوه على النت وتلعبها كتير جدا , كل لما تحس انك وحيد والشخص وحشك قوم بسرعه العبها" 

اليوم الثالت : ده اكتر يوم هيكون صعب لانك هتصحي من النوم هتبقى عاوز تكلم الشخص , بس بقى الموضوع ده مهم , لو انت شايف ان الشخص ده مش هينفع يفضل جمبك وفي حياتك لانك هتفضل بتحبه ممكن تعمل الموضوع ده ولازم تمشي بيه بالظبط , لان دي اسهل واصعب طريقه هتقابلها ومحدش اتكلم عنها قبل كده "وانا جربتها فعلا ودي الى خرجتني من اكتئابي".

تبدأ تتدور على سلبيات الشخص ده , كل لما تفكر فى ايجابياته فكر فى السلبيات اكتر واكتر, افتكر معاملته الوحشه, لو كنتوا بتتكلمو فيس بوك ادخل على الانبوكس ودور على الرسائل الى كنتوا بتتخانقوا فيها واقراها, فكر فى كل حاجه وحشه فيه, فكر فى شاكله وحاول ترسم جواك ان الشخص ده وحش , اكرهه جدا , الطريقه دي ناجحه 100% 

اما بقي لو مقدرتش تعملها ممكن تدخل معايا على اليوم الرابع وتتجاهل اليوم الى فات ده 

اليوم الرابع : اليوم ده هتكون وصلت فى حالة عاليه من البؤس وده معناه ان مفيش حاجه قصرت فيك من الكلام الى فوق الا طبعا لو مكنتش عملت الخطوه بتاعت "3 يوم" , اليوم الرابع حاول تتواصل مع الشخص, اتكلم معاه عادي, وحاول تقلل كلامك حبه حبه, يعني هترجع تكلمه تاني عادي جدا فى حدود صداقه وكده, وتحاول تخرج منه واحده واحده, الروتين بتاع الحب هيرجع لروتين صداقه وده تقدر تعمله على مدار ال3 ايام المتبقين واكيد هتكون نسيت... بس مش اكيد 100% لان كلنا بنختلف عن بعض.

فى النهايه لازم تكون عارف انك استحاله تنسي حد خالص لما بتبعد عن شخص معين لفتره بتبقى فاكر انك نسيته لاكن فى الحقيقه هو انه بيكون موجود فى مكان صغير كده جواك ممكن مره واحده يرجع يتفتح تاني لو الشخص ده حسسك انه محتاجك تاني, كل الخطوات والطرق دي بتحاول تقفل الفتحه دي حبه حبه عشان تنسي وتتعايش حياتك الممله البائسه.

فى حب المدونه

متستغربش من اسم المدونه , عادى يعنى !

ايه المشكله لما احب حاجه الكترونيه خياليه غير ملموسه , الحاجه الاكترونيه دى اكيد مش هحس منها بمشاعر ولا حب , بس بردو هفضل احبها ! لانها اكيد مش هتكرهنى فى يوم من الايام , اكيد مش هتحب حد غيرى وتخونى وكده , اكيد مش هلاقيها فى يوم من الايام بتعاملنى وحش.

ساعات لما بتكون بتحب حاجه مش بتحتاج منها اى ردة فعل خالص بتحتاج بس انها تخليك تحبها , تسيبك تفرغ مشاعرك ليها , تسيبك تقول كل الى جواك.

يمكن انا خونت مدونتى دى لأنى بقالى كتير مش بفتحها , ولا بتكتب فيها !

وكمان عملت مدونات غيرها حكيت فيها حكايات حساسه جدا,واتكلمت فى مواضيع مهمه , بس رجعتلها فى الاخر لأنى بحبها , ومش منتظر منها حب , يمكن التدوينه دى صغيره , بس كنت محتاج اتأسف ليها, كنت محتاج ارجعلها واكتب فيها حاجه , كنت محتاج اخرج مشاعرى

شكرا مدونتى :) 

عيش ممحون تبقى رئيس قد الدنيا

عيش ممحون

"مصر ام الدنيا وهتبقى قد الدنيا" هكذا قالها السيسى وهو مبتسم ابتسامه "صفراء خبيثه" ببذلته العسكريه او كما غنتها جنات بفستانها الاحمر فى احتفالية اكتوبر وهى تسير بجوار فنانين لطالما كانو لعبة فى يد الحاكم "ربما انت بداخلك الأن تتسائل لماذا اريد منك ان تتخيل معى هذه الصورة المليئه بالـ"محن"  لاكن يجب ان يتم تجهيزك لقرأة هذه المدونة المليئه بالمحن . 

تعريف عن الشعب المصرى : هو اكثر شعب "طيب فشخ" اكثر شعب "متدين فشخ" اكثر شعب "بيتضحك عليه",طبعا اول وصف وثالث وصف هما وصفين حقيقين فعلا,بس الوصف الثانى هو وصف الى عمله كداب "مش هتكلم عنه كتير دى عاوزه مقاله لوحدها",انا شخصيا لا اخجل أن اعترف أننى طيب وكان بيتضحك عليا من صغرى "كنت فاكر ان رئيس الجمهورية مش بيموت وان 99,9% من الشعب المصرى بيختار حسنى مبارك فى الانتخاب وان انا ال00.1% الى مش بينزل يصوت عشان مش معايا بطاقة انتخابيه", كان بيتضحك عليا وانا بتفرج على مجلس الشعب "غصب عنى بسبب ان كان فى مسلسل بحب اتابعه بيجى من بعده" وانا بتفرج على المعارضه وهما بيتخانقو او بيزعقو مكنتش اعرف انها معارضة كرتونيه زى سابق ولاحق وكابتن ماجد وبكار .. بدأت ابعد عن الموضوع الرئيسى,المحن ! 

هل تعلم ان مفيش حد حتى الأن وصل الى منصب رئاسة مصر غير بالمحن ؟ 
جمال عبد الناصر سواء كنت تحبه او تكرهه فيجب ان تعترف انه كان ممحوناً تذكر معى خطابة عن التنحى كيف تحدث لكى يخدع المصريين ! 
انور السادات كذلك رغم قوته وشدته ورغم نجاحه فى حرب 73 ورغم تفوقه الا انه استخدم نظرية المحن لكى يجمل ويحسن من اتفاقية السلام 
ويعود الأمر ايضاً لمبارك اكثر من استخدم المحن على مدار 30 عاما تذكر كيف وقف يوم 1 فبراير ليتحدث للملايين الغاضبه فى ميدان التحرير,ليذكرهم ببطولاته الذائفه وليتحدث عن الاوقات الصعبة الى تمر بها مصر وانه اذا رحل ستحدث فوضى وانه هو الأمن والامان,قدر انه يدوس بمحنه على حاجه فى الشعب طيبته.

اذا كنت متابع جيد للاحداث وقت الثورة ستأكد ان حوالى نصف من كانو فى ميدان التحرير رحلو عنه بسبب حديث مبارك بالرغم من انهم رأوا بأم اعينهم الشهداء تسقط على يد الداخليه.

"مرسى" لن اتحدث كثيرا عن هذا المدعو يكفى ان اذكركم بالمقوله الشهيره "لازم كلنا نحب بعض"

ليأتى لنا اكبر ممحون على وجه الارض "اذا كنت تأقرأ كلامى الذى بالأعلى بأتقان وتركيز ستعرف ان كل من استخدمو الـ"محن" مع الشعب المصرى استخدموه فى اوقات متأخره "مش قبل اما يبقو رؤساء"" 

"ستات مصر لازم تقنعو ازواجكم وعيالكم ينزلو الانتخابات" قالها السيسى فى مؤتمر السيدات الذى عقده لكى يطفاء بعضاً من شهوتهم.

حكايتى مع الثوره..!

 كانت اكتر حاجه مزعلانى وانا بتفرج على فيديوهات الثورة يوم 2 فبراير 2011 * يوم موقعة الجمل* انى مش عارف ايه بيحصل فى قلب الميدان وانى مكنتش جزء من الثورة دى والروح هناك عامله ازاى وبسبب صغر سنى وقتها مكنتش عارف اسيب بيتنا وامشى بسبب خوفى من والدى وقتها وبسبب ان القنوات معظمها كان بيصور من فوق عماير ميدان التحرير او كانو بيجيبو مشاهد من بعيد للاشتباكات لذلك قررت اتفرج على الفيديوهات الى على النت من ناس عاديين بيصورو وبيرفعو شغلهم بنفسهم بدون تذيف للحقيقه وكنت عاوز اعرف حكاية صفحة كلنا خالد سعيد  اول لما عرفت ان خدمة الانترنت اشتغلت تانى بعد انقطعها لفتره طويله وعلى طول حتى مروحتش فتحت النت فى البيت روحت لاقرب سيبر من محل والدى الى كنت قاعد فيه وقتها.
اول حاجه عملتها قررت ادخل صفحة كلنا خالد سعيد واشوف الفيديوهات الى كانو بيقولو ان هى السبب فى قتل خالد..مكنتش لاقيها على الصفحة وقتها كل الى كنت لاقيه على الصفحة اخبار من شبكة رصد وطرق كسر البروكسى لتشغيل الانترنت فا توجهت لليوتيوب وكتبت خالد سعيد وشوفت اول حاجه فيديو في صور ليه وهو مضروب ووشه متكسر ووقتها ومشاعرى كا طفل مقدرتش امسك نفسى وعيط فعلا عليه واحد شاكله نضيف ومحترم وشاب يحصل فيه كل ده ليه وطبعا مقدرتش اكمل الفيديو وقفلته
اهو الفيديو ده تقريبا !

https://www.youtube.com/watch?v=zbNgvFxG9jE

وبعدين افتكرت هدفى الاساسى انى اشوف ايه الى حصل بالظبط والمواجهه الى حصلت بين المتظاهرين والداخليه وبالفعل اليوتيوب كان مليان فيديوهات كان معظمها دهس للمتظاهرين بمدرعات الامن المركزى والشاب الى اتضرب بالنار فى اسكندريه لما وقف فى وش العساكر وفتح صدره الفيديو الى كان متصور من بلكونه و فيديو الشاب الى وقف فى وش عربية رش المياه وغيره وغيره فيديوهات ندمتنى انى ما عرفتش اكون جزء من ده او مكنتش بشارك فى الحراك السياسى الى حصل قبل الثورة مع انى كنت موجود على الانترنت من 2006 وكان عندى حساب قديم بأسم medo ashor بس اتقفل لاسباب مش عارفها وكان الاكونت الحالى هو أكونت بديل ليه

وبعد اما اتفرجت على الفيديوهات الى بجد خنقتنى اكتر اما كنت مخنوق بسبب قعادى فى البيت زى البنات ووجود الرجال فى الشارع بيحاربو النظام الفاسد والفاشل الى قعد 30 سنه بقانون طؤارى يحق لظابط مجموعه 50% يقبض على دكتور او مهندس يتفوق عليه علميا بسبب *انه شاكك فيه*

المهم روحت البيت يومها وقررت اواجه واكون راجل ! بس مش اواجه النظام اواجه والدى الى كنت بخاف منه ... وبالفعل تانى يوم الصبح روحت كلمت امى الى كانت مشغله الجزيره 24 ساعه وبتعيط وبتشتم وبتسب فى نظام مبارك وبتتحايل على والدى هى كمان عشان ننزل الميدان .. بس هو كان بيفضل ينزل لوحده بحجة ان انا راجل العيله لو حصله حاجه وان هو وجوده فى الميدان بيمثلنا كلنا واننا مش لازم نشارك طالما هو بيشارك .. حاولت اقناع امى نضغط عليه تانى ونحاول نزعق ونتخانق معاه عشان يسمع كلامنا وينزلنا وبالعفل بعد ضغط كبير مننا نزلنا الميدان كان تانى يوم موقعة الجمل 3فبراير 2011 يومها كان اعظم يوم فى حياتى كنت فرحان جدا انا هنا فى ميدان التحرير ! ماشى على ارض اعظم مكان فى العالم وقتها ! انا دخلت ميدان التحرير وواقف جنب الثوار والابطال الى شوفتهم على الانترنت واليوتيوب قعدنا طوال النهار فى الميدان مكنتش عاوز اروح وكنت قررت الاعتصام بس طبعا والدى رفض -_- .. وانا مكنتش قادر اتكلم معاه او اعانده بصراحه !! لانى مكنتش متصور انه ممكن ينزلنى الميدان اصلا

وبعدين الحساب بتاعى الاساسى الى هو medo ashor اتقفل فى اسباب مش عارفها !! وبعدين قررت مفتحش النت مؤقتا واتابع من التلفزيون لان كان بدأ يجى افلام وثائقيه على القنوات التلفزيونيه زى دريم وon tv والجزيره لحد اما جه اليوم العظيم فى تاريخ مصر يوم 11 فبراير وقدرو يفهمونا اننا خلعنا مبارك وان خلاص الفساد سقط وانا زى وزى ناس كتير صدقنا وفرحنا وقررت ارجع على الفيس بوك تانى عشان اتابع الحملات الى صفحة كلنا خالد سعيد وغيرها هيعملوها عشان نبدأ نستعد للاصلاح .. اول حاجه عملتها على الاكونت ده انى غيرت صورة البروفيل لصورة الشهداء يوم 11 فبراير كان دى اكبر حاجه اقدر اعملها ليهم !! هى تافهه بس انا كنت شايفها حاجه كبيره !! كنت طفل

وبالفعل بدأت اشترك فى صفحات سياسية كتير بهدف المتابعه وابدأ اشارك فى الحملات الى عمولها زى اتجوز بجنيه وهنضف مصر وغيرها من خطوات كنا نأمل فعلا انها تغير حاجه ونكون بلد متقدمه !! ... كنا نأمل

من أنا ... لمن يهمه الأمر .. ازاى نخرج من الازمه ؟؟

بما انى كل ثانتين لازم حد يدخل يسئلنى عن توجهى يسئلنى اذا كانت ثوره ولا انقلاب يسئلنى عن السيسى يسئلنى عن رقم موبيلى "مش فاهم عاوزينه ليه" المهم كنت لازم ارد رد طويل شويتين وقولت استغل بصراحه انى بقالى فتره مش بكتب اى حاجه وانزلها على المدونه قولت انزلها عشان اجيب عدد مشاهدات حلوه .. وقسمت الى عاوز اقوله فى كام خطوه كده بالحجات الى انا مقتنع بيها  :- 

1- 30 يونيو ثوره شعبيه خرج فيها ثوار 25 يناير والفلول ... والي بيحصل حاليا من قتل وتعذيب فى السجون على الثوار الى نزلو 25يناير 2011 لاسقاط مبارك و30/6 لاسقاط مرسى الفاشل .. يخلينا نقول ان الانقلاب حصل على شباب ثورة 30 يونيو و 25 يناير مش على مرسى الفاشل والعر* "+18" الاكبر.

2- الدستور فى مواد عظيمه جدا مع بعض التحفظات على كام ماده ولكن انا كنت ضد طريقة الدعايا للمشاركه فى الدستور لان فى دوله محترمه لما بيتعمل دستور كل وسائل الاعلام بتفهم وتوعى المواطن بأهمية المشاركه فى الدستور مش لامواخذه بتقوله انزل قول نعم عشان الاستقرار او نعم عشان تدخل النار.

3-بالنسبه لموقفى من يوم 25يناير2014 انا كنت ضد النزول كان عندى "بُعد نظر" فى الى كان هيحصل وان المواجهه هتكون بين شباب لا ينتمى للاخوان او الفلول وانما ينتمى ل25 يناير فقط مقابل الشعب المغيب من اجهزة الاعلام والتلفزيون وده الى حصل فعلا يعنى لو مثلا تعرف حد نزل يومها هيقولك ان الى كان بيضرب فيهم او يقبض عليهم مش شرطه بس لا ده الشعب نفسه .

4- بالنسبه لرابعه انا غير متعاطف معاها ولا متعاطف مع المتعاطف معاها ولا متعاطف مع المتعاطف مع المتعاطف معاها .. بس كده.

طب ايه الحل الى يخرجنا من كل العبث الى احنا بنعيشه فى الوقت ده "حلوه كلمت عبث دى تحس انى ناشط سياسى او كاتب محنك"

انا مش مع النزول فى الوقت الحالى "قبل ما تبدأ تقلب وشك وتجيب فى سيرة امى او تقول الفاظ نابيه اسمعنى للاخر لانك لما تشوف الفكره دى هتعجبك وممكن تشتغل عليها او تنشرها لحد يقدر يشتغل عليها 

الفكره ايه؟؟ 

-مش فى النزول او مسيره او وقفه لا لا لا خالص الفكره اننا هنقعد فى البيت "طبعا انت دلوقت بتقول عنى جبان وخاين وعميل وفلول صح" انا عاوزك تجاوب كده على كام سؤال قبل اما تكمل باقى التدوينه 

س1 : انت شايف ان المظاهرات دلوقت بتغير حاجه ؟؟

س2: انت شايف ان الى بيموت دلوقت حقه بيجي ؟؟ "على اساس ان الى كان بيموت قبل كده حقه كان بيجى"

س3: انت شايف انك لما تتحبس وتتعذب هتغير حاجه ؟؟ 

اقولك الاجابه ايه على ال3 اسئله دول (لا)  ايوه لا المظاهرات دلوقت مبقاش ليها اى طعم ولا بتغير الناس بقت تتعامل معاها على انها شئ روتينى اتعودو عليه طبعا موضوع موت الناس ده مش محتاج اتكلم فيه .. وانت يا حلو لما تتسجن فى الوقت الحالى عشان تخرج محتاج كفاله وركز فى حوار الكفاله ده هنحتاجه بعدين وممكن متخرجش ويتلفق ليك شوية قواضى حلوه وتتسجن ومستقبلك يضيع ومش هتغير حاجه ندخل بقى على الحل .. 

ركزت على موضوع الكفاله ده ؟؟ طب ركزت على موضوع ان الشعب هو الى بيواجهك دلوقت وكره حاجه اسمها ثوره ومظاهرات 

ايه رائيك نجمع بين الحاجتين ؟؟ طب ازاى انا هقولك 

محدش فينا فكر طول ال3 سنين الى فاتو يعمل حاجه للشعب .. ازاى يا عم ما كنا بننزل نضحى بحياتنا عشانه وعشان البلد انا مقصدش حرية الشعب انا اقصد بطن الشعب ؟؟ لبس الشعب ؟؟ عيشتة ؟؟ بيته ؟؟ قدمت حاجه ؟ اجابتك بردو لا "لما كلو لا لا لا امال مين الى بيقولو نعم دول" ما علينا خلينا صريحين مع بعض الثوره مقدمتش حاجه للشعب غير شوية حريه وحاليا مبقاش فى حريه.. "وانا بكتب التدوينه دى مش ضامن هعرف اكملها ولا لا" الى مفروض نعمله فى الوقت الحالى نشتغل فى الشارع "يعنى هنعمل ايه" جمعية خيريه حركه حزب اى حاجه مش هتفرق نوعها ايه تكون بأسم الثوره تشتغل بأسم الثوره تعرف الناس ان الى عاملها هما شباب الثوره الى عاوزين مصلحة البلد ومصلحة المواطن الفقير الغلبان طب والحركه او الجمعيه او الحزب دى هتعمل ايه بشكل اوضح شويه .. هتعمل اسواق باسعار قليله ! هتروح للقرى الفقيره الى معندهمش مياه وتوصل ليهم مياه هتروح للناس الى محتاجه لبس وتجيب ليهم لبس ! يعنى هتسد بق كل محتاج ويكون المحتاج عارف ان الى بيعمل ليه كده مش الحكومه او الدوله لا دى الثوره "استنى استنى استنى انت هتجيب فلوس الكلام ده منين يا حلو" فاكرين موضوع الكفاله بدل ما كل شويه واحد يروح يسلم نفسه عشان يكون بطل ويبقى عارف انه هيخرج بكفاله واحنا بنعرف نجمع ليه كفاله طب ما نجمع فلوس لكل ده فلوس بدل ما ندفعها ثمن تربه لشاب مات او كفاله لشاب مقبوض عليه ندفعها للشعب المحتاج والى مضحوك عليه من الاعلام ومفهمه انك ضده .. وساعتها انزل ثور براحتك وهتلاقى الغلبان ده واقف فى ضهرك مستعد يموت علشانك وعلشان البلد وهيبقى فهم معنى الثوره ايه هو ده الحل الى عندى والى عارف انه مش هيوصل لحد او ممكن حد يعمله لان عادة الثوار هو الكلام فقط مفيش تنفيذ على ارض الواقع .. ايام سوده

كاركتير | ممنوع الاقتراب منطقة محظوره